धुळे शहरातील प्रसिद्ध हजरत मेहबुब सुभानी बाबा दर्गाचे होणार सुशोभिकरण..

पर्यटन मंत्री ना. आदित्य ठाकरे या स्थळाला भरघोस निधी देणार - आमदार फारूक शाह

धुळे दि.०३-११-२०२० - शहरात लहान टेकडीवर ऐतिहासिक असे मेहबुब सुभानी दर्गाह हे अत्यंत पवित्र आणि जागृत स्थान आहे. मेहबुब सुभानी दर्गाह हा अतिशय प्राचीन दर्गा आहे. मुस्लीम बांधवांच्या समवेतच हिंदू समाजातील भिल्ल, आदिवासी बांधव देखील या दर्ग्यास आदराचे स्थान मानतात. त्यांचे मान-मानता, नवस करत असतात. नवसाला पावणारा देव म्हणुन या दर्ग्याचे स्थान खुप मोठे आहे. या ठिकाणी दररोज धार्मिक कार्यक्रम होत असतात. त्याच प्रमाणे दर गुरुवारी व शुक्रवारी सर्व धर्मीय नागरिक येथे दर्शनासाठी येत असतात. त्याच प्रमाणे गुरुवारी अन्नदानाचा कार्यक्रम आयोजित केला जातो व त्याला प्रचंड प्रतिसाद मिळत असतो. या दर्ग्यावर जाण्यासाठी कुठल्याही प्रकारचा रस्ता नाही व लाईटची सोय नाही. सर्व टेकडी चढ-उताराची आहे. वयोवृद्ध भाविकांना या दर्ग्यावर जाणे-येणे फारच त्रासदायक होत असते. दर वर्षी उरूस, संदल असे कार्यक्रम ५-६ दिवस मोठ्या उत्साहात साजरे होतात. या दर्ग्यास धुळे शहरा बरोबर मालेगाव, सटाणा, अंतापुर ताहराबाद, शिरपुर, शिंदखेडा, अंमळनेर, पारोळा, जळगाव या परिसरातुन २० ते २५ हजार भाविक मोठ्या प्रमाणावर येत असतात. तरी या ठिकाणी भाविकांच्या सोईसाठी रस्ता होणे तसेच विजेची सोय देखील होणे अत्यंत गरजेचे आहे. याला अनुसरून आज धुळे शहराचे आमदार फारूक शाह यांनी मंत्रालय मुंबई येथे पर्यटन मंत्री, पर्यावरण, राजशिष्टाचार श्री. आदित्य ठाकरे यांची भेट घेऊन मेहबूब सुभानी दर्गाह बाबतचे नुतनीकरण व सुशोभिकरण करणेबाबतचे निवेदन सादर केले. त्याला प्रतिसाद देत श्री. आदित्य ठाकरे यांनी या स्थळाला भरघोस निधी देणार असल्याचे मान्य करत लवकरात लवकर निधी उपलब्ध करून देऊ असे आश्वासन दिले.