महानगरपालिकेच्या निवडणुकीसाठी तयारीला लागा : धर्मराज साळवे

 

अहमदनगर : संघटित राहण्याला खूप महत्त्व आहे. पक्षाच्या सर्व पदाधिकारी कार्यकर्त्यांनी संघटीत राहून समाजातील गोरगरीब, तळागाळातील नागरिकांसाठी काम करायचे आहे. तसेच महापालिकेच्या आगामी निवडणुकीसाठी पदाधिकारी व कार्यकर्त्यांनी तयारीला लागावे, असे प्रतिपादन ए. आय. एम. आय. एम. चे पश्चिम महाराष्ट्रातील प्रवक्ते धर्मराज साळवे यांनी केले. खासदार व प्रदेश अध्यक्ष इम्तियाज जलील, प्रदेश कार्याध्यक्ष डॉ. गफ्फार कादरी यांच्या सूचनेनुसार ते नुकतेच नगर येथे आले होते. येथील शासकीय विश्रामगृहावर पक्षाच्या पदाधिकारी व कार्यकर्त्यांच्या झालेल्या बैठकीत साळवे बोलत होते. पश्चिम महाराष्ट्र अध्यक्ष अकील मुजावर यांनी याबाबत एक समितीची स्थापना करून त्या समितीतील पदाधिकाऱ्यांना अहमदनगर येथे पाठवले होते. अहमदनगर येथे होणाऱ्या यापुढील सर्व स्थानिक स्वराज्य संस्थांच्या निवडणुकीसाठी कार्यकर्त्यांनी तयारी करावी तसेच वारंवार वरिष्ठांशी चर्चा करावी. कार्यकर्त्यांना याबाबत वरिष्ठ पातळीवर सहकार्य केले जाईल, असेही या समितीतील शब्बीर शाह यांनी म्हटले आहे. यावेळी एम. आय. एम. अहमदनगरचे जिल्हाध्यक्ष डॉ. परवेज अशरफी यांनी साळवे व शाह यांचा सत्कार करून त्यांचे स्वागत केले. तसेच वर्षभरातील संघटनेच्या माध्यमातून केलेल्या कामांचा अहवाल सादर केला. याप्रसंगी डॉ. परवेज अशरफी म्हणाले की, येणाऱ्या महानगरपालिका तसेच जिल्ह्यातील इतर तालुक्यांच्या नगरपालिका निवडणुकीसाठी तयारी सुरू आहे. जिल्ह्यात कार्यकर्त्यांचे संघटन मजबूत करण्याचे कामही युद्धपातळीवर सुरू आहे. समाजातील गोरगरीब नागरिकांच्या अडचणी सोडविण्याचे काम संघटनेच्या माध्यमातून सुरू आहे. शिवाय, संघटनेच्या प्रलंबित असलेल्या विविध मागण्यांसाठी शासन दरबारी निवेदनाच्या माध्यमातून पाठपुरावा सुरू आहे. जिल्ह्यात दिवसेंदिवस पक्ष संघटना मजबूत होत आहे. खासदार असदुद्दीन ओविसी यांना मानणारा युवा वर्ग पक्षासोबत जुळत आहे, असेही डॉ. परवेज अशरफी यांनी सांगितले. शेवटी साळवे व शाह यांनी अहमदनगर येथे डॉ. परवेज अशरफी यांच्या मार्गदर्शनाखाली सुरू असलेल्या कामांबाबत समाधान व्यक्त केले. तसेच सर्वांनी डॉ. अशरफी यांना पक्ष संघटना मजबूत करण्यासाठी सहकार्य करण्याचे आवाहनही साळवे यांनी केले.यावेळी 

पश्चिम महाराष्ट्र प्रवक्ते साळवे, शब्बीर शाह, एम. आय. एम. जिल्हाध्यक्ष डॉ. परवेज अशरफी, जिल्हा महासचिव जावेद शेख, मुफ्ती अल्ताफ अहमदनगरी, शेवगाव तालुका अध्यक्ष युसुफ शेख, शहर युवा अध्यक्ष अमीर खान, जामखेड तालुका अध्यक्ष जाकिर काझी, कर्जत तालुका अध्यक्ष डॉ. अन्सार शेख, राहुरी तालुका अध्यक्ष नविद बागवान, समाजसेवक उबैद बागवान, शहर युवा प्रवक्ता बशीर शेख शहर युवा महासचिव इम्रान हुसेन आदी उपस्थित होते. डॉ. परवेज अशरफी यांनी उपस्थितांचे आभार मानले.