अमृत नोनी डी प्लस विक्रेत्यांवर अन्न व औषध प्रशासनची कारवाही
दिनांक 21 12 2019 रोजी अन्न व औषध प्रशासन कोकण विभागातील परिमंडळ 6 मधील अधिकाऱ्यांना प्राप्त झालेल्या गोपनीय माहिती च्या आधारे , अन्न व औषध प्रशासन (ठाणे )कार्यालयातील औषध निरीक्षक श्री नितीन आहेर व श्रीमती पुनम साळगावकर यांनी त्वरित मेसर्स मिनी डिस्ट्रीब्यूटर , डोंबिवली या घाऊक औषधी विक्रेत्याकडे धाड घातली असता सदर विक्रेत्याकडे अमृत नोनी डी-प्लस (AMRUT NONI D-PLUS ) हे डायबिटीस करिता उपयुक्त असल्याचा दावा करणारे आयुर्वेदिक औषध आढळून आले.
सदर औषध हे डायबिटीस वर गुणकारी असल्याचे लेबल वर नमूद असल्याने सदर औषधाचा वापर डॉक्टरांच्या सल्ल्याशिवाय होऊ शकतो, सदर बाब औषधे व जादूटोणादि उपाय (आक्षेपार्ह जाहिराती ) कायदा १९५४ अंतर्गत नियमांचे उल्लंघन करते .त्यामुळे सदर दुकानातील सुमारे 25 हजार रुपयाचा अमृत नोंदणी डी प्लस या आक्षेपार्ह मजकूर असलेल्या औषधाचा साठा जप्त करण्यात आला असून संबंधितांवर योग्य ती प्रशासकीय तथा न्यायालयीन कारवाई घेण्यात येत आहे . सदर प्रकरणी वरील कारवाई परिमंडळ ६ चे सहाय्यक आयुक्त श्री श्री रा. पं. चौधरी व कोकण विभागाचे सह आयुक्त औषधे श्री दुष्यंत भांबरे यांच्या मार्गदर्शनानुसार घेण्यात आली आहे. सर्वसामान्य जनतेने औषधे उत्पादनावर असणाऱ्या भ्रामक दाव्यांना बळी पडून स्वतःच्या मनाने औषधे सेवन करू नये व अशा प्रकारच्या भ्रामक जाहिराती असणाऱ्या औषधांबाबत अन्न व औषध प्रशासनाच्या संबंधित जिल्हा कार्यालय तसेच टोल फ्री क्रमांक 1800222365 वर तक्रार नोंदवावी असे आवाहन माननीय आयुक्त श्री. परीमल सिंह यांनी केले आहे.
